✓15 მარტს ამოიწურა ESEM სემინარის აბსტრაქტების მიღების ვადა. მონაწილეობის სურვილი გამოთქვა 22 ქვეყნის 66-მა მეცნიერმა. საპროგრამო კომიტეტის გადაწყვეტილება გამოცხადდება აპრილის შუა რიცხვებში. 1 მაისს კი ESEM -ის ოფიციალურ ვებ-გვერდზე განთავსდება სემინარის წინასწარი პროგრამა.
გამოვხატავთ ჩვენს უღრმეს მწუხარებას ქართული ტრადიციული მუსიკის ერთ-ერთი პატრიარქის, სიცოცხლეშივე ლეგენდად ქცეული ხალხური მუსიკოსის ბატონ ისლამ ფილფანის გარდაცვალების გამო. ხანგრძლივმა და ნაყოფიერმა მოღვაწეობამ იგი თავისი კუთხის მუსიკალური კულტურის სიმბოლოდ აქცია. წარმოუდგენელი იყო, სვანური სიმღერით დაინტერესებულ შინაურ თუ უცხოელ მუსიკოსს ან, უბრალოდ, მუსიკის მოყვარულს გვერდი აევლო ბატონი ისლამისა და მისი ოჯახისათვის. ბრწყინვალე ლოტბარმა, მომღერალმა და სვანური ხალხური საკრავების უბადლო მცოდნემ, არა ერთი ხალხური მუსიკოსი აღზარდა თავის ანსამბლ „რიჰოში“, რომელიც ცნობილია არა მარტო საქართველოში, არამედ თვით ყველაზე შორეულ უცხო ქვეყნებში.
ბატონი ისლამის მასპინძლობდა ყველას, ვინც სვანეთს სტუმრობდა, დაუღალავად უზიარებდა თავის მდიდარ გამოცდილებას სვანური სიმღერების შესწავლის ქართველ თუ უცხოელ მსურველებს, მათ შორის ტრადიციული მრავალხმიანობის საერთაშორისო სიმპოზიუმების მონაწილე მეცნიერებსა და შემსრულებლებს.
ბატონი ისლამი იყო გამორჩეული, განუმეორებელი, მის პიროვნებაში თითქოს მთლიანდებოდა სვანური კულტურის ათასწლოვანი ისტორია და თანამედროვეობა, რის გამოც სცენაზე მისი ყოველი გამოჩენა აუდიტორიაზე მომნუსხველ ზემოქმედებას ახდენდა.
აუნაზღაურებელია ისლამ ფილფანის დანაკლისი ქართული კულტურისათვის. მსუბუქი იყოს მისთვის ქართული მიწა!
რიგით 33-ე “ეთნომუსიკოლოგიის ევროპული სემინარი” (ESEM)
ეთნომუსიკოლოგია 21-ე საუკუნეში
5-9 სექტემბერი, 2017, თბილისი, საქართველო
ეთნომუსიკოლოგიის 33-ე ევროპულ სემინარს 2017 წლის 5-9 სექტემბერს თბილისის. ვ. სარაჯიშვილის სახელობის სახელმწიფო კონსერვატორიის ტრადიციული მრავალხმიანობის კვლევის საერთაშორისო ცენტრი უმასპინძლებს.
21-ე საუკუნეში ეთნომუსიკოლოგიის წინაშე ბევრი გამოწვევაა. ერთ-ერთი მათგანია, თუ როგორ გამოვხატოთ ტრადიციული მუსიკის ფუნქციების ფართო სპექტრი თანამედროვე საზოგადოებაში. ამ გამოწვევასთან შესახვედრად ეთნომუსიკოლოგია გაცილებით მრავალთემატური და მრავალმხრივი გახდა. ის არ ივიწყებს ძველ როლს, მაგრამ, ამავე დროს, თანამედროვე მსოფლიო ტენდეციების მიმართ ახალ მიდგომებსა და მეთოდოლოგიებს ეძებს. ჩვენ დღეს ალბათ უნდა ვისაუბროთ “ეთნომუსიკოლოგიებზე” და არა ერთ “ეთნომუსიკოლოგიაზე”, ვინაიდან მთელი რიგი დისციპლინური ინტერესები საკმაოდ ფართოა – მსოფლიოს ყველაზე იზოლირებულ რეგიონში მცხოვრები უძველესი ხალხების მიუწვდომელი მუსიკალური ტრადიციებიდან, მრავალჯერ გარდაქმნილ და კომერციალიზებულ თანამედროვე ფორმებამდე.
ამიტომ ჩვენ გადავწყვიტეთ ეეს-ის 2017 წლის თემები გავაერთიანოთ საერთო სათაურის ქვეშ:
ეთნომუსიკოლოგია 21-ე საუკუნეში
✓ ემერიტუს პროფესორმა რუსუდან წურწუმიამ, ერასმუსის გაცვლითი პროგრამით, ვენის მუსიკისა და სახვითი ხელოვნების უნივერსიტეტსა და ამავე უნივერსიტეტის მუსიკალური ფოლკლორის კვლევისა და ეთნომუსიკოლოგიის ინსტიტუტში 31 ოქტომბრიდან 4 ნოემბრამდე ჩაატარა ლექციები და სემინარი თემაზე: ქართული ტრადიციული მრავალხმიანობა ქართული ისტორიისა და კულტურის კონტექსტში (Georgian Traditional Polyphony in the Context of Georgian History and Culture).
თბილისის სახელმწიფო კონსერვატორიამ, ქართული ხალხური სიმღერის საერთაშორისო ცენტრმა და საქართველოს ფოლკლორის სახელმწიფო ცენტრმა 2016 წლის 26 – 30 სექტემბერს თბილისის სახელმწიფო კონსერვატორიაში საქართველოს კულტურისა და ძეგლთა დაცვის სამინისტროსა და შოთა რუსთაველის ეროვნული სამეცნიერო ფონდის ფინანსური მხარდაჭერით, საქართველოს პრეზიდენტის გიორგი მარგველაშვილის პატრონატით ტრადიციული მრავალხმიანობის VIII საერთაშორისო სიმპოზიუმი გამართა.
მერვე სიმპოზიუმში მონაწილეობდა 49 მეცნიერი მსოფლიოს ხუთივე კონტინენტის 22 ქვეყნიდან, ამათგან 15 მეცნიერი საქართველოდან. სიმპოზიუმის სამეცნიერო სესიებს განსაკუთრებული ხიბლი შეძინა ხალხური მრავალხმიანობის კონცერტები, რომლებიც საქართველოს სახელმწიფო ოპერის თეატრის დიდ დარბაზში, რუსთაველის თეატრისა და კონსერვატორიის მცირე დარბაზებში გაიმართა. მათში მონაწილეობდნენ ქართული მრავალხმიანობის ქართველი და უცხოელი შემსრულებლები, ოჯახური ანსამბლები, აგრეთვე, სარდინიული ანსამბლი CONCORDU LUSSURZESU.
სომპოზიუმზე წარმოდგენილი იქნა რენატო მორელის (იტალია) ორი ფილმი – წმინდა ხმები: კონკორდუს მომღერალი ორი თაობა ვნების კვირაში (სარდინია) და მრავალაჟამიერი: მოგზაურობა სიმღერით სვანეთში ფილფანის ოჯახთან და მელბურნის ქართულ გუნდთან ერთად და ჰუგო ზემპისა (საფრანგეთი) და ნონა ლომიძის (ავსტრია/საქართველო) ფილმი – სუფრული სიმღერები კახეთში.
2016 წლის 15 აპრილს დასრულდა ტრადიციული მრავალხმიანობის მე-8 საერაშორისო სიმპოზიუმის მონაწილეთა რეგისტრაცია, 25 აპრილისთვის კი სიმპოზიუმის საპროგრამო კომიტეტმა გამოაცხადა თეზისების განხილვის შედეგები.
რიგით მე-8 სიმპოზიუმში, რომელიც თბილისის სახელმწიფო კონსერვატორიაში ჩატარდება 2016 წლის 26-30 სექტემბერს, სხვადასხვა ფორმატით მონაწილეობის მისაღებად დაშვებულია 53 მეცნიერი, ამათგან მსოფლიოს 17 ქვეყნიდან 32 უცხოელი და საქართველოდან 23 მკვლევარი.
თბილისის სახელმწიფო კონსერვატორიის ტრადიციული მრავალხმიანობის კვლევის ცენტრი აცხადებს, რომ 2016 წლის
26-30 სექტემბერს ჩატარდება ტრადიციული მრავალხმიანობის მე-8 საერთაშორისო სიმპოზიუმი.
ღონისძიებაში მონაწილეობის მისაღებად, გთხოვთ, გაეცნოთ სიმპოზიუმზე მოწვევას:
მოწვევა-ტრადიციული-მრავალხმიანობის-მე-8-საერთაშორისო-სიმპოზიუმზე-თბილისი-26-30-სექტემბერი-2016
ასევე გთხოვთ, გულდასმით წაიკითხოთ ვადების პარაგრაფი და ყურადღება მიაქციოთ მონაწილეობის დადასტურების ელექტრონულ ფორმას
თბილისის სახელმწიფო კონსერვატორიის ტრადიციული მრვალხმიანობის კვლევის საერთაშორისო ცენტრი 2011 წლიდან არის საერთაშორისო ორგანიზაციის – ეთნომუსიკოლოგიის ევროპული სემინარის წევრი (ESEM).
2016 წლიდან კი ის ტრადიციული მუსიკის საერთაშორისო საბჭოს (ICTM) კორპორატიული წევრიც გახდა.
ტმკსც აქტიურად თანამშრომლობს ორივე ორგანიზაციასთან.
2013 წელს ცენტრის მიერ მომზადებული ანგარიში საქართველოს მუსიკალურ-ფოლკლორული და ეთნომუსიკოლოგიური ცხოვრების შესახებ, გამოქვეყნდა ტრადიცული მუსიკის საერთაშორისო საბჭოს (ICTM) აპრილის თვის ბიულეტენში.
